Вывучаем беларускую мову разам з Velcom

Вывучаць беларускую мову ў форме цікавых сустрэч і інтэрактыўных гульняў падрастаючаму пакаленню прапанавала ўнітарнае прадпрыемства Velcom. У 2015 годзе пры падтрымцы Міністэрства адукацыі Рэспублікі Беларусь кампанія ініцыявала сацыяльна-адукацыйны праект па папулярызацыі беларускай мовы і літаратуры – «Чытаем па-беларуску з Velcom».

У якасці настаўнікаў да школьнікаў прыязджаюць вядомыя беларускія тэлевядучыя, пісьменнікі, акцёры і спартоўцы. За гэты перыяд незвычайныя ўрокі прайшлі ва ўсіх абласцях нашай краіны. Віцебшчына стала апошняй у спісе правядзення акцыі. 22 сакавіка арганізатары завіталі ў Наваполацк. Месцам для сустрэчы сталі гімназія №2, СШ №№ 7, 12.

На прыкладзе сваіх твораў вядомая беларуская пісьменніца Раіса Баравікова пазнаёміла юных новапалачан з прыгожым вершаваным словам на роднай мове, а абаронца наваполацкага футбольнага клуба «Нафтан» Міхась Гарбачоў правёў інтэрактыўную гульню са школьнікамі на веданне спартыўных тэрмінаў па-беларуску.
Напрыканцы сустрэчы маленькія ўдзельнікі рэспубліканскага праекта атрымалі прыемныя падарункі – закладкі ад кампаніі Velcom і аўтограф ад Раісы Баравіковай.

Раіса Баравікова, беларуская пісьменніца:

– Мы жывём у час інфармацыйных тэхналогій, таму я лічу, што пісьменнікі і паэты не павінны сядзець на месцы. Трэба пастаянна рупіцца аб тым, каб лепшае зерне беларускай асветы трапляла ў душы грамадства. Полацкая зямля не выпадкова стала адной з першых у спісе рэалізацыі праекта на Віцебшчыне, бо гэта калыска нашай дзяржаўнасці. Юныя новапалачане вельмі парадавалі мяне сваімі ведамі і культурай размовы.

Вераніка Макарава, каардынатар праекта Velcom:

– У нашай кампаніі ёсць два напрамкі дзейнасці ў сферы карпаратыўнай і сацыяльнай адказнасці. Гэта нацыянальная самаідэнтыфікацыя і дапамога дзецям. Праект «Чытаем па-беларуску з Velcom» унікальны тым, што ён сумяшчае гэтыя напрамкі. Яго мэта – развіццё інтарэса малодшых школьнікаў да вывучэння беларускай мовы, прыцягненне ўвагі да роднай мовы, гісторыі, літаратуры праз сустрэчы з рэальнымі беларускімі пісьменнікамі, паэтамі, спартоўцамі. Сваёй акцыяй мы хочам паказаць дзецям тое, што вучыць беларускую мову можна весела і цікава.

Міхась Гарбачоў, абаронца наваполацкага ФК «Нафтан»:

– Калі мне прапанавалі паўдзельнічаць у праекце, я адразу згадзіўся. Беларуская – наша родная мова. На мой погляд, падобныя акцыі трэба праводзіць не толькі сярод дзяцей, але і сярод дарослых.

Нэлі РАДЗЬКО
Фота Таццяны Русаковіч