З 19 па 21 красавіка ў Наваполацку адбудзецца Міждзяржаўны конкурс юных піяністаў «Музычная лілея»

З 19 па 21 красавіка ў культурнай сталіцы Беларусі – Наваполацку расквітнее «Музычная лілея».

Міждзяржаўны конкурс юных піяністаў закліканы вытанчанымі гукамі класічнага мастацтва папулярызаваць дасягненні сусветнай фартэпіяннай музыкі, пашыраць культурныя сувязі паміж гарадамі-пабрацімамі, выяўляць таленавітых дзяцей, каб даць ім магчымасць заявіць пра сябе.

У гэтым годзе да нас прыедуць пачынаючыя таленты з Расіі, Беларусі, Латвіі. Ацэньваць узровень валодання інструментам будуць выкладчык Рэспубліканскай гімназіі-каледжа пры Беларускай дзяржаўнай акадэміі музыкі Яўгенія Гарбунова, прафесар Латвійскай акадэміі музыкі імя Я. Вітола Арніс Зандманіс.

Старшынёй журы стане прафесар Беларускай дзяржаўнай акадэміі музыкі, мастацкі кіраўнік Беларускай дзяржаўнай філармоніі Юрый Гільдзюк.

Пераможцы конкурсу ўпершыню атрымаюць спецыяльныя кубкі з сімволікай фестывалю.

Урачыстае адкрыццё V Міждзяржаўнага конкурсу юных піяністаў гарадоў-пабрацімаў адбудзецца 19 красавіка а 14-й гадзіне.

Нэлі РАДЗЬКО