Пяць наваполацкіх немаўлят на свой дзень нараджэння атрымалі вышыванку

На Дзень Незалежнасці Рэспублікі Беларусь 3 ліпеня і Дзень беларускай вышыванкі 2 ліпеня ў Наваполацкім радзільным доме на свет з’явіліся пяцёра немаўлят – тры хлопчыкі і дзве дзяўчынкі.

Юлія Іванковіч і Ганна Міхно радасць мацярынства адчулі ўпершыню, а Кацярына Савіцкая, Ганна Старцава і Анастасія Анушчанка сталі мамамі ў другі раз. Павіншаваць жанчын са знамянальнай падзеяй прыйшлі прадстаўнікі Наваполацкай арганізацыі грамадскага аб’яднання «Беларускі рэспубліканскі саюз моладзі» на чале з яе першым сакратаром Аляксандрам Прохаравым. Да віншавальнай місіі далучыліся прадстаўнікі адміністрацыі гарбальніцы. Дадаткам да доб­рых слоў сталі падарункі і кветкі, якія ўручылі кожнай маладой маці. Сярод  цукерак і цацак прыемная неспадзяванка – маленькая кашуля з нацыянальным беларускім арнаментам.  Такім чынам БРСМ імкнецца паспрыяць распаўсюджванню народнай культуры сярод маладых бацькоў і звярнуць іх увагу да вытокаў. «Чаму вышыванка? Таму што гэта наша гісторыя. Продкі верылі, што нацыянальны ўзор з’яўляецца абярэгам, які здольны ахоўваць маленькіх дзетак ад розных хвароб і непрыемнасцяў. Акцыя «Падары немаўляці вышыванку» ў межах рэспубліканскага праекта «Беларусь – крыніца натх­нення» стартавала тры гады таму. І мы з радасцю да яе далучыліся», – адзначыў Аляксандр Юр’евіч.

Некалькімі днямі пазней Ганну Старцаву і Кацярыну Савіцкую, якія нарадзілі на Дзень Незалежнасці Беларусі, павіншавалі актывісты Наваполацкай арганізацыі Рэспубліканскага грамадскага аб’яднання «Белая Русь». Вядучы спецыяліст па арганізацыйна­кадравай працы гарадскога фарміравання Алеся Кажан уручыла маладым маці кветкі і наборы дзіцячай пасцельнай бялізны.

Нэлі РАДЗЬКО

Фота Дзяніса Лешчыка