Воспитанница Новополоцкого музыкального колледжа завоевала четыре награды на международных конкурсах

Чатыры ўзнагароды на міжнародных творчых конкурсах заваявала навучэнка школы практыкі пры Наваполацкім музычным каледжы Паліна Кірпічонак.

Таленавітая вучаніца вопытнага педагога музкаледжа Нэлі Бароўскай стала лаўрэатам І ступені Міжнароднага шматжанравага конкурсу-фестывалю «Пятое время года» (г.Франкфурт-на-Майне, Германія), ІІ ступені iнтэрнацыянальнага дыстанцыйнага песеннага конкурсу «Campanella» (г.Мілан, Італія) і XV інтэрнэт-конкурсу ў Польшчы «Digi-Talenty Zima 2020», адзначана дыпломам ІІІ Міжнароднага музычнага конкурсу «GoodWin Art». Замежную публіку 13-гадовая новапалачанка ўразіла пранікнёным выкананнем беларускіх народных песень «А з гары ручаёк коціцца», «Сею лён» і народнай песні «А ў нядзелю раненька» ў апрацоўцы наваполацкага музыканта Ігара Валькоўскага. Зорнай для Паліны стала намінацыя «Народны вакал. Сола».

За высокае педагагічнае майстэрства і вялікі ўнёсак у справу захавання і развіцця нацыянальнай традыцыйнай культуры дыпломамі міжнароднага фестывальнага руху адзначана і педагог дзяўчыны – Нэлі Бароўская. Як расказала Нэлі Леанідаўна, падрыхтоўка да інтэрнэт-конкурсаў вялася вельмі сур’ёзная, бо ў складзе журы замежных фестываляў былі вядучыя дзеячы мастацтваў Еўропы, удзельнікі і арганізатары прэстыжных творчых праектаў, лаўрэаты міжнародных фестываляў. Конкурсная барацьба была даволі гарачай. Толькі фестываль у Германіі сабраў амаль 4 тысячы ўдзельнікаў з розных краін свету.

Нэлі РАДЗЬКО