Наваполацкая калекцыя батлеічных тэатраў на выставе ў Мінску

Самую багатую калекцыю батлеічных тэатраў на выставе ў Мінску прадставіў народны тэатр лялек «КапялюШ» Цэнтра рамёстваў і традыцыйнай культуры г.Наваполацка.

Экспазіцыя «Батлейка – класіка і сучаснасць», якая адкрылася ў гасцёўне Уладзіслава Галубка Нацыянальнага гістарычнага музея Рэспублікі Беларусь, сабрала экспанаты з розных куткоў краіны. Тут можна пабачыць як класічныя, так і сучасныя інтэрпрэтацыі класікі, выяўленча-апавядальны тэатр Камішыбай. Жлоб і вельмі рэдкую марыянеткавую батлейку, інтэрмедыі «Свет у базарны дзень», «Дзівосныя авантуры Кубліцкага і Заблоцкага», а таксама 54 арыгінальных тэатральных лялек прывёз у сталіцу кіраўнік наваполацкага калектыву «КапялюШ» Андрэй Рэцікаў. Гэта найбольш буйная і цікавая з прадстаўленых калекцый, што яшчэ раз пацвердзіла: наваполацкі батлеечны тэатр – адзін з лепшых у краіне. Дарэчы, 15 і 16 кастрычніка Андрэй Міхайлавіч правядзе ў гасцёўне У. Галубка майстар-класы для ўсіх жадаючых. А выстава працягне сваю работу да 21 лістапада.

Нэлi РАДЗЬКО