В честь 140-летия со дня рождения великого белорусского писателя Янки Купалы в Новополоцке запустили новый городской интеллектуально-познавательный проект «Адгукніся, душа…»

У музеі гісторыі і культуры Наваполацка стартаваў гарадскі інтэлектуальна-пазнавальны турнір «Адгукніся, душа…», прысвечаны 140-годдзю з дня нараджэння народнага паэта Беларусі Янкі Купалы. У першай гульні адборачнага этапа сустрэліся чатыры каманды.

Як расказаў малод­шы навуковы супрацоўнік музея Аляксандр Клімята, новы праект прызваны больш глыбока пазнаёміць юнае пакаленне з айчыннай гісторыяй і яе выбітнай постаццю – пісьменнікам Янкам Купалам. Народны паэт Беларусі знакаміт не толькі ў нашай краіне, але і за мяжой. Яго верш «А хто там ідзе?» перакладзены на 100 моваў свету.

Удзел у турніры прымаюць зборныя каманды навучэнцаў старэйшых класаў агульнаадукацыйных школ і першакурснікаў сярэдніх спецыяльных і прафесійна-тэхнічных навучальных устаноў горада. Яны сустрэнуцца ў пяці турах. За першае месца паспрачаюцца лепшыя па колькасці набраных балаў. Аднак дыпломамі і прыемнымі падарункамі задаволяць усіх гульцоў. Арганізатарамі турніра выступаюць Наваполацкі гарадскі выканаўчы камітэт, аддзел ідэалагічнай работы, культуры і па спра­вах моладзі, аддзел па аду­кацыі гарвыканкама, музей гісторыі і культуры, рэдакцыя газеты «Наваполацк сёння», гарадскія арганізацыі грамад­скіх аб’яднанняў «Беларускі фонд міру» і «Беларускі саюз жанчын».

Першая серыя гульняў стартавала на мінулым тыдні. У сяброўскім суп­рацьстаянні сышліся каманды сярэдніх школ №1, 7, БШ №10 і політэхнічнага каледжа. Юнакі і дзяўчаты адказвалі на пытанні па гісторыі Беларусі, Наваполацка, а таксама па творчасці Янкі Купалы. Лепшую суму балаў набралі «Бусляняты» (СШ №7) і «Палітэх» з НДПК.

Наступная сустрэча пройдзе ўжо 10 лю­тага. Фінал плануюць правесці 27 красавіка.

Нэлі Радзько