В Новополоцке прошел праздник национальной культуры «Вераснёвая палітра – 2023». Фоторепортаж

У гарадскім парку ў мінулую суботу з шырокім размахам прайшло свята нацыянальнай культуры «Вераснёвая палітра – 2023», якое нягледзячы на пахмурнае надвор’е, сабрало шмат гасцей і аматараў беларускіх традыцый.

Майстар-класы па стральбе з лука, фехтаванні, саломапляценні, набіванцы, абрадавай ляльцы, мастацкаму роспісу, фітабар, народныя танцы са скрыпкай і дудой, кірмаш рамеснікаў… Вялікае мноства тэматычных пляцовак традыцыйна прадставілі наваполацкія Цэнтр культуры, Цэнтр рамёстваў і традыцыйнай культуры, а таксама многія іншыя госці мерапрыемства.

Так, Віцебскі народны клуб гістарычнай рэканструкцыі «Vargentorn», які ўпершыню прыняў удзел у свяце, вельмі цікава адлюстраваў традыцыйныя рамёствы IX – XI стагоддзяў. А прадстаўнікі тэатра гістарычнага касцюма «Полацкі звяз» прыплылі к месцу галоўнага дзеяння на караблі вікінгаў – дракары.

Клуб сярэднявяковай рэканструкцыі «Чорны война» Цэнтра рамёстваў прадставіў традыцыйную беларускую кухню: дранікі, полеўку, ушку, тушаную бульбу, фітабар с травяным чаем і глінтвейнам. Усе стравы гатавалі на вуліцы, што дадала асаблівы каларыт святу.

Гледачоў канцэртнай праграмы прывітаў кіраўнік народнага тэатра лялек «КапялюШ» Андрэй Рэцікаў з казачнай пастаноўкай. Прадоўжыў выступленне фальклорны клуб «Vargan», які арганізаваў цэлую пляцоўку народных танцаў пад жывую музыку з выкарыстаннем беларускіх інструментаў. Аўтэнтычнымі народнымі песнямі гасцей парадавалі наваполацкія творчыя калектывы «Княжыч», «Кола», «Вербіца», «Камарыкі», «Сузор’е», а таксама вучаніцы сярэдняй школы №7, якія прадставілі нумар з акарынай і бубнам.

Восеньская сустрэча, прысвечаная вялікаму земляробчаму святу ўраджая Багач, была прасякнута фальклорнымі матывамі, духам гісторыі і традыцый. 

Наталля Харына

фота Віктара Арлова